பூ ஒன்று புயலானது 2

 

அத்தியாயம் 2 

நீதிமன்ற வளாகம் அன்று பரபரப்பானது. தீர்ப்பு அறிவிக்கப்பட இருந்ததால், அஞ்சலியும், வழக்கறிஞர் சுதாவும் நம்பிக்கையற்ற பதற்றத்துடன் காத்திருந்தனர். அஞ்சலியின் குடும்பத்தினர் தூரத்தில் நின்று கொண்டிருந்தனர். மறுபுறம், உயர் அதிகாரியான திரு. விஸ்வநாதன், தன் மகன் சித்தார்த்துடன், மிகவும் இறுக்கமான முகத்துடன் அமர்ந்திருந்தார். அவர்களின் முகத்தில், தங்கள் அதிகாரமும் பணமும் இந்தப் போராட்டத்தை எளிதாக முடித்துவிடும் என்ற ஒரு இறுமாப்பான நம்பிக்கை இருந்தது.

சரியாக 11:00 மணிக்கு, நீதிபதி இருக்கைக்குப் பின்னால் இருந்த திரை விலகியது.

நீதிபதி திரு. இராமநாதன் மிகவும் நிதானமாக அமர்ந்தார். நீதிமன்ற அறையில் ஊசியின் சத்தம் விழுந்தால் கேட்கும் அளவுக்கு அமைதி நிலவியது.

"வழக்கு எண்: 457/2025. அரசுக்கு எதிராக சித்தார்த். தீர்ப்பு வாசிக்கப்படுகிறது."நீதிபதி தன் இருக்கையில் சாய்ந்து, தன் வாதத்தை ஆழமான குரலில் ஆரம்பித்தார். சுதாவின் வாதத்தின் மையப்புள்ளி வலுப்பெற்றது.

நீதிபதி இராமநாதன்:"இந்த நீதிமன்றத்தின் முன் உள்ள முதன்மையான கேள்வி இதுதான்: திருமண வாக்குறுதி கொடுத்துப் பெறப்பட்ட சம்மதம், சட்டப்படி சம்மதமாகக் கருதப்படுமா?"

"குற்றம் சாட்டப்பட்டவரின் தரப்பு வழக்கறிஞர், இது இரு தரப்பினரின் சம்மதத்துடன் நடந்த 'காதல் உறவு' தோல்வியடைந்ததின் விளைவு என்று வாதிட்டார். ஆனால், வழக்கறிஞர் சுதா எழுப்பிய முக்கியமான வாதத்தை இந்த நீதிமன்றம் கவனிக்கிறது: ஒரு பெண்ணின் சம்மதம், அது உண்மை என்ற முழு நம்பிக்கையுடன் கூடியதாக இருக்க வேண்டும்."

அவர் புதிய சட்டத்தின் சில பிரிவுகளைக் குறிப்பிட்டார்:

"சம்மதத்தைப் பெறுவதற்காக ஏமாற்றப்பட்டால், அல்லது தவறான தகவலின் அடிப்படையில் சம்மதம் தெரிவிக்கப்பட்டால், பாரதிய நியாய சன்ஹிதா (BNS) பிரிவு 63-ன் படி, அந்தச் சம்மதம் செல்லாது. திருமண வாக்குறுதி அளித்து, அதன் மூலம் ஒரு பெண்ணின் 'சம்மதத்தைப் பெறுவது' என்பது BNS-இன் கீழ் பாலியல் வன்முறைக்கான (கற்பழிப்பு) வரையறைக்குள் வரும் ஒரு செயலாகவே இந்த நீதிமன்றம் கருதுகிறது. ஏனெனில், இங்கு அளிக்கப்பட்ட சம்மதம் என்பது தவறான நம்பிக்கையின் அடிப்படையில் பெறப்பட்டது."

"இந்த வழக்கில், சித்தார்த், திருமணம் என்ற ஒரு பிரம்மாண்டமான பொய்யான வாக்குறுதியைக் கொடுத்து, அஞ்சலியின் ஆழ்ந்த நம்பிக்கையைச் சுரண்டி உள்ளார் என்பது தெளிவாகிறது. அவனுடைய உள்நோக்கம் ஒருபோதும் அவளைத் திருமணம் செய்வது அல்ல; அவனுடைய தந்தையின் அதிகாரம், தன் காமப் பசியைத் தீர்க்க உதவும் ஒரு கருவி மட்டுமே."

"குற்றம் சாட்டப்பட்ட சித்தார்த், தன் தந்தையின் உயர்ந்த பதவியின் செல்வாக்கைப் பயன்படுத்தி, தான் சட்டத்தின் கைகளில் இருந்து தப்பிக்க முடியும் என்று நம்பினார். ஒருவரின் சமூகப் பின்னணியும், அதிகாரமும் நீதியைக் கடக்காது என்பதை இந்த நீதிமன்றம் நிலைநிறுத்த விரும்புகிறது."

"எனவே, திருமண வாக்குறுதியைக் கொடுத்து ஏமாற்றிப் பெறப்பட்ட உறவு, BNS பிரிவு 64-ன் படி, பாலியல் வன்முறை (கற்பழிப்பு) என்ற குற்றத்திற்குள் வருகிறது என்பதை இந்த நீதிமன்றம் உறுதி செய்கிறது."

நீதிபதி தனது தீர்ப்பின் இறுதிப் பகுதிக்கு வந்தார். அஞ்சலி கண்ணீருடன், சுதாவின் கைகளைப் பற்றிக்கொண்டாள். சித்தார்த்தின் தந்தையின் முகம் வெளிறிப் போனது.
நீதிபதி இராமநாதன்: (உறுதியான குரலில்)
"குற்றம் சாட்டப்பட்ட சித்தார்த் மீது, பாரதிய நியாய சன்ஹிதா (BNS) பிரிவு 64 (பாலியல் வன்முறை/கற்பழிப்பு) மற்றும் பிரிவு 318 (ஏமாற்றுதல்) ஆகிய குற்றங்கள் நிரூபிக்கப்பட்டுள்ளன.

குற்றவாளி சித்தார்த்துக்கு,
பிரிவு 64-ன் கீழ், பத்து ஆண்டுகள் கடுங்காவல் தண்டனை விதிக்கப்படுகிறது.
பிரிவு 318-ன் கீழ், ஓர் ஆண்டு சாதாரண சிறைத் தண்டனை விதிக்கப்படுகிறது.
கூடுதலாக ₹5,00,000 (ஐந்து லட்சம் ரூபாய்) அபராதமும் விதிக்கப்படுகிறது. அபராதத் தொகையைக் கட்டத் தவறினால், மேலும் ஒரு வருடம் சிறைத் தண்டனை நீட்டிக்கப்படும்.

இரண்டு தண்டனைகளும் ஏக காலத்தில் (concurrently) அனுபவிக்கப்பட வேண்டும்.
அபராதமாக வசூலிக்கப்படும் தொகையில் இருந்து ₹4,00,000 (நான்கு லட்சம் ரூபாய்) பாதிக்கப்பட்ட அஞ்சலிக்கு இழப்பீடாக வழங்கப்பட வேண்டும்."
"நீதிமன்றம் நிறைவடைகிறது!"

தண்டனை அறிவிக்கப்பட்டதும், நீதிமன்றத்தில் ஒரு பெருத்த இரைச்சல் எழுந்தது.

சித்தார்த், அதிர்ச்சியில் உறைந்துபோய் அமர்ந்திருந்தான். அவனுடைய தந்தை, அரசு அதிகாரி திரு. விஸ்வநாதன், கோபத்துடனும் அவமானத்துடனும் தனது வழக்கறிஞரை நோக்கி ஆவேசமாகக் கத்தத் தொடங்கினார். 'மேல்முறையீடு செய்வோம்!' என்று கத்தியபடியே அவர்களை நோக்கி விரைந்தார்.

அஞ்சலிக்கு உடனே அழுகை வந்தது, ஆனால் இந்த முறை அது அவமானத்தின் கண்ணீர் அல்ல; நீதி கிடைத்ததின் கண்ணீர்.

வழக்கறிஞர் சுதா, அஞ்சலியின் தோளைப் பற்றி, "பார்த்தாயா அஞ்சலி, உன் தைரியமும், சத்தியமும் இந்த அதிகாரத்தை வென்றுவிட்டது. சட்டம் ஏழை, பணக்காரன் என்று பார்ப்பதில்லை, அது நீதி மட்டுமே பேசும்" என்று கூறினார்.

சுதா, தனது வழக்கை வென்ற திருப்தியுடன், தான் எப்போதும் நீதிக்குப் போராடும் ஒரு போர்வீரர் என்பதை நிரூபித்தார். அஞ்சலி இப்போது தன் புதிய வாழ்க்கையை, பயம் நீங்கி, ஒரு புதிய நம்பிக்கையுடன் தொடங்கத் தயாரானாள். இந்தத் தீர்ப்பு, காதல் என்ற பெயரில் ஏமாற்றப்பட்ட மற்ற பெண்களுக்கும் ஒரு பெரிய நம்பிக்கைக் கதையாக மாறியது.

அஞ்சலி நேராக சித்தார்த்திடம் ஓடியவள் எச்சிலை பரிசாக கொடுத்துவிட்டு அங்கிருந்து அவள் பெற்றோருடன் சென்றாள்.

சித்தார்த் மற்றும் அவன் தந்தையின் பார்வை
வழக்கறிஞர் சுதா மற்றும் அஞ்சலி மீது கொலை வெறியுடன் பதிந்தது.

அது வழக்கறிஞர் சுதாவின் வீடு. சுதா, நீதிமன்றத்தின் கடுமையான பெண் சிங்கம் என்றால், அவரது மகள் ஷிஃப்னா ( shifna) மிகவும் சாந்தமான, ஆனால் தைரியமானவள். சுமார் இருபது வயது மதிக்கத்தக்க ஷிஃப்னா, மெலிந்த தேகம், எப்போதும் பிரகாசமான புன்னகையுடன் கூடிய முகத்தைக் கொண்டவள். அவள் கண்களில் தன் தாயின் அதே உறுதியும் நீதிக்கான தீர்க்கமும் நிறைந்திருந்தது. அவள் இப்போது முதல் வருடக் கல்லூரி மாணவி.

ஷிஃப்னா, ஹாலில் இருந்த சோபாவில் அமர்ந்து, தனது லேப்டாப்பில் பாடப்புத்தகங்களைப் படித்துக் கொண்டிருந்தாள். அவளது அத்தை மகன் விஷ்ணு ஒரு சத்தத்துடன் ஓடி வந்து அவள் முன் நின்றான்.

"ஷிஃப்னா அக்கா! இங்கே பார், டி.வி.யில் யார் வராங்கன்னு பார்! என்றான் விஷ்ணு"

ஷிஃப்னா லேப்டாப்பை மூடிவிட்டு,
விஷ்ணு காட்டிய டி.வி.யைப் பார்த்தாள். செய்திச் சானல் ஒன்றில், ஒரு பரபரப்பான செய்தி ஓடிக் கொண்டிருந்தது.

"அதிகாரப் பின்னணி கொண்ட சித்தார்த்துக்கு எதிராக, திருமண வாக்குறுதி மீறிய வழக்கில், இன்று நீதிமன்றம் வரலாற்றுச் சிறப்புமிக்கத் தீர்ப்பை வழங்கியுள்ளது. பாதிக்கப்பட்ட மாணவி அஞ்சலிக்கு ஆதரவாக வாதாடி, நீதி கிடைக்கச் செய்த, இளம் வழக்கறிஞர் சுதாவின் துணிச்சலான வாதம்... என்றார் செய்தியாளர்"

திரையில், சுதா நீதிமன்றத்தை விட்டு வெளியே வரும் காட்சி, அவர் அஞ்சலியின் கையைப் பிடித்து ஆறுதல் கூறும் காட்சி எல்லாம் ஓடிக் கொண்டிருந்தது. அந்தச் செய்தி, அஞ்சலிக்கு நீதி கிடைத்ததைப் பற்றிப் பேசியது. ஷிஃப்னா, தன் தாயின்
சாதனையைப் பார்த்து ஒரு கணம் பெருமிதத்தில் சிலிர்த்தாள்.

 "அம்மா... எப்பவும்இப்படித்தான் டா. எளியவங்களுக்காகப் போராட அவளுக்கு ரொம்பப் பிடிக்கும்."

 "ஆமா அக்கா! உங்க அம்மா எப்பவும் சூப்பர் வுமன் தான். இன்னைக்கு அந்தப் பெரிய அதிகாரிக்கு எவ்வளவு அவமானம்! என்றான் விஷ்ணு"

ஷிஃப்னா புன்னகைத்தாள். தன் தாய் நீதிக்காகப் போராடுவது அவளுக்குள் ஒரு விதமான பாதுகாப்பு உணர்வையும், சமூகப் பொறுப்பையும் ஏற்படுத்தியிருந்தது.

மறுநாள், ஷிஃப்னா கல்லூரியில் தன் தோழிகளுடன் பேசிக் கொண்டிருந்தாள். அப்போது, அவர்ககளை நோக்கி அஸ்வின் என்ற சக மாணவன் வநதான். அவன் அமைதியானவன், எப்போதும் புத்தகங்களோடும் படிப்போடும் இருப்பவன். ஷிஃப்னாவிடம் பேசுவதற்காகவே தயங்கித் தயங்கி வந்தான்.

அவன், கையில் ஒரு சிவப்பு ரோஜாவையும், சாக்லேட் பெட்டியையும் வைத்திருந்தான். ஷிஃப்னாவின் தோழிகள், சிரிப்புடன் அவளைப் பார்த்தனர்.

 "ஷிஃப்னா... உன்கிட்ட தனியா பேசணும் என்றான் பதற்றத்துடன் இல்ல."

ஷிஃப்னா அமைதியாகத் தன் தோழிகளிடம் சிரித்துவிட்டு, அஸ்வினைப் பின் தொடர்ந்தாள். கல்லூரியின் மூலையில் இருந்த நிழலான இடத்திற்கு இருவரும் சென்றனர்.

"ஷிஃப்னா, எனக்கு உன்னை ரொம்பப் பிடிக்கும். நீ தைரியமானவள், கலகலப்பானவள். நான் உன்னைக் காதலிக்கிறேன் என்றான் ரோஜாவை நீட்டி . நீ என் காதலை ஏத்துப்பியா?"

அஸ்வின் சொன்ன விதம் அவனுக்கு இருந்த உண்மையான உணர்வுகளைக் காட்டியது. பொதுவாக, இதுபோன்ற சூழலில் மாணவர்கள் கோபமாகவோ, கூச்சமாகவோ நிராகரிப்பார்கள். ஆனால், ஷிஃப்னா அப்படிச் செய்யவில்லை. தன் தாயின் மூலம், அவள் வாழ்க்கையின் கசப்பான பக்கங்களைப் பார்த்திருந்தாள்.

'காதல்' என்ற பெயரில் நடக்கும் ஏமாற்றங்களும், வன்முறையும் அவளுக்கு அஞ்சலியின் வழக்கில் தெளிவாகப் புரிந்திருந்தது.

ஷிப்னா அவனது ரோஜாவை  தொடாமல், அவனது கண்களைப் பார்த்து கனிவுடன் பேசினாள்

அஸ்வின், நீ நல்ல பையன்னு எனக்குத் தெரியும். ஆனா, நான் இப்போதைக்கு காதல் உறவு, டேட்டிங் இதெல்லாம் பத்தி யோசிக்கலை. நீ என்னைக் காதலிக்கிறேன்னு சொல்றதுக்கு ரொம்ப நன்றி."

அஸ்வின் முகம் குழப்பத்துடன் சுருங்கியது. "ஏன் ஷிஃப்னா? நான் ஏதாவது தப்பு பண்ணிட்டேனா?"

"இல்லை அஸ்வின், நீ எந்தத் தவறும் செய்யவில்லை. ஆனா, இப்போ என் வாழ்க்கையில் எனக்கு முக்கியமானது என் படிப்பு மட்டும்தான். என் அம்மா ஒரு வழக்கறிஞர். நான் சமீபத்தில் ஒரு வழக்கைப் பார்த்தேன். அதுல, ஒரு பொண்ணு 'காதல்' என்ற ஒரு நல்ல உணர்வை நம்பி, ஏமாற்றப்பட்டு, கஷ்டப்பட்டாள்."

அஸ்வின், காதல் என்பது வெறும் கவர்ச்சியோ, அல்லது ஒரு விளையாட்டு இல்ல. அது ஒரு பெரிய நம்பிக்கை. ரெண்டு பேர் வாழ்க்கையைச் சம்பந்தப்படுத்துற ஒரு பெரிய உறுதிமொழி. நான் இப்போ உன் உணர்வுகளை ஏத்துகிட்டா, சில வருஷம் கழிச்சு நம்முடைய இலக்குகளும், வாழ்க்கைப் பாதையும் வேற வேறயா மாறலாம். அப்படி ஒரு சூழல் வந்தா, அது உனக்கும் எனக்கும் மனரீதியா ரொம்பக் கஷ்டத்தைக் கொடுக்கும்."

"அதனால, இப்போ நாம ரெண்டு பேரும் நல்ல நண்பர்களா மட்டும் இருப்போம். நம்முடைய இலக்குகளை அடைய கவனம் செலுத்துவோம். எதிர்காலத்துல, நம்முடைய வாழ்க்கைப் பாதை ஒன்றாக இணைஞ்சா, அப்போ இந்த உணர்வுகளைப் பற்றிப் பேசலாம். ஆனா, அதுவரைக்கும் நம்முடைய நட்பும், படிப்பும் மட்டும்தான் முக்கியம்."

ஷிஃப்னாவின் வார்த்தைகளில் இருந்த தெளிவும், நேர்மையும் அஸ்வினைத் திகைக்க வைத்தது. கோபமோ, அலட்சியமோ இல்லாமல், அவள் தனது நிராகரிப்பை எவ்வளவு கண்ணியமாகவும், பொறுப்புடனும் முன் வைத்தாள்.

அஸ்வின் தன் கையில் இருந்த ரோஜாவையும் சாக்லேட்டையும் மெதுவாகக் கீழே இறக்கினான்.

"நீ சொல்றது எனக்குப் புரியுது ஷிஃப்னா. நீ உண்மையிலேயே தெளிவான பொண்ணு. நான் உன் முடிவை மதிக்கிறேன். நாம நல்ல நண்பர்களா இருப்போம் என்றான் அஸ்வின்.

தொடரும்....